ໃນຕອນເຊົ້າເວລາ 9:30 ຂອງວັນທີ 29 ມິຖຸນາ 2019 ທີ່ບ້ານດົງນາໂຊກເໜືອ, ເມືອງ ສີໂຄດຕະບອງ, ນະຄອນຫຼວງວຽງຈັນ ໄດ້ຈັດພິທີມອບຮັບຫ້ອງການສູນສະຖິຕິແຫ່ງຊາດຫຼັງໃໝ່ ໂດຍການເຂົ້າຮ່ວມເປັນກຽດຂອງ ທ່ານ ສົມສະຫວາດ ເລັ່ງສະຫວັດ ອາດິດ ຮອງນາຍົກລັດຖະມົນຕີ, ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ປອ ສະໄໝຈັນ ບຸບຜາ ຫົວໜ້າສູນສະຖິຕິແຫ່ງຊາດ, ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ຄໍາໄພ ສົມຊະນະ ປະທານບໍລິສັດກຸ່ມຄໍາໄພຊະນະຈໍາກັດຜູ້ດຽວ ຜູ້ຮັບເໝົາກໍ່ສ້າງ, ບໍລິສັດທີ່ປຶກສາກໍ່ສ້າງ, ບັນດາທ່ານ ຮອງຫົວໜ້າສູນສະຖິຕິແຫ່ງຊາດ, ຫົວໜ້າກົມ, ຮອງຫົວໜ້າກົມ ກະຊວງແຜນການ ແລະການລົງທຶນ, ຫົວໜ້າພະແນກ, ຮອງຫົວໜ້າພະແນກ, ຫົວໜ້າສູນສະຖິຕິ, ຮອງຫົວໜ້າສູນສະຖິຕິປະຈໍາແຂວງທົ່ວປະເທດ, ຄະນະກໍາມະການກໍ່ສ້າງ, ພ້ອມດ້ວຍພະນັກງານຫຼັກແຫລ່ງພາຍໃນສູນສະຖິຕິແຫ່ງຊາດ ກໍ່ໄດ້ເຂົ້າຮ່ວມຢ່າງພ້ອມພຽງ. ໃນພິທີມອບ-ຮັບ ຫ້ອງການສູນສະຖິຕິແຫ່ງຊາດຄັ້ງນີ້ ທ່ານ ຄໍາໄພ ສົມຊະນະ ໃນນາມບໍລິສັດຮັບເໝົາກໍ່ສ້າງ ໄດ້ເຊັນມອບ-ຮັບຫ້ອງການສູນສະຖິຕິແຫ່ງຊາດຫຼັງໃໝ່ ຮ່ວມກັບ ທ່ານ ປອ ສະໄໝຈັນ ບຸບຜາ ຫົວໜ້າສູນສະຖິຕິແຫ່ງຊາດ, ຮອງລັດຖະມົນຕີ ກະຊວງແຜນການ ແລະ ການລົງທຶນ ເຊິ່ງໂຄງການກໍ່ສ້າງນີ້ ໄດ້ເລີ້ມການກໍ່ສ້າງມາແຕ່ທ້າຍປີ 2013 ແລະ ໄດ້ຮັບອະນຸມັດໂຄງການກໍ່ສ້າງຈາກລັດຖະບານ ແຫ່ງ ສປປ ລາວ ແລະ ສຳເລັດໃນທ້າຍປີ 2017.
ໃນພິທີມອບຮັບ ຫ້ອງການສູນສະຖິຕິແຫ່ງຊາດຫຼັງໃໝ່ ໃນນາມການນໍາກະຊວງແຜນການ ແລະ ການລົງທຶນ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ມີຄໍາເຫັນ ແລະ ກ່າວມອບຫ້ອງການສູນສະຖິຕິແຫ່ງຊາດ ໃຫ້ແກ່ສູນສະຖິຕິແຫ່ງຊາດ ເພື່ອຄຸ້ມຄອງ, ປົກປັກຮັກສາ ແລະ ນໍາໃຊ້ໃຫ້ມີປະສິດທິພາບສູງ ແລະ ຍາວນານ.
ຫ້ອງການສູນສະຖິຕິແຫ່ງຊາດ ເປັນສະຖານທີ່ເຮັດວຽກແຫ່ງໃໝ່ ຢ່າງເປັນທາງການ ເລີ້ມແຕ່ ວັນທີ 01/07/2019 ເປັນຕົ້ນໄປ.
ທີ່ຢູ່ທາງລັດຖະການແມ່ນ: ກະຊວງແຜນການແລະການລົງທຶນ ສູນສະຖິຕິແຫ່ງຊາດ
ຖະໜົນ:ທາງຕັດໃໝ່ໜອງບຶກ, ບ້ານ ດົງນາໂຊກເໜືອ, ເມືອງ ສີໂຄດຕະບອງ,
ນະຄອນຫຼວງວຽງຈັນ, ສປປ ລາວ
ໂທ: (+856-21) 214740
ແຟັກ: (+856-21) 242022
ເວັບໄຊ: http//www.lsb.gov.la
ທີ່ຢູ່ຂ້າງເທິງນີ້ ຈະເປັນບ່ອນຕິດຕໍ່ພົວພັນວຽກງານສະຖິຕິ ສໍາລັບພາຍໃນ ແລະ ຕ່າງປະເທດ