ວັນທີ 3 ກໍລະກົດ 2024 ທີ່ນະຄອນຫຼວງວຽງຈັນ, ສູນສະຖິຕິແຫ່ງຊາດ, ກະຊວງ ແຜນການ ແລະ ການລົງທຶນ ໄດ້ຈັດກອງປະຊຸມສຳມະນາຂຶ້ນ ພາຍໃຕ້ຫົວຂໍ້ “ຕອບສະໜອງຄວາມຕ້ອງການສະຖິຕິ ໃນຍຸກສະໄໝທີ່ມີການປ່ຽນແປງໄວ” ເນື່ອງໃນໂອກາດສະເຫຼີມສະຫຼອງວັນສະຖິຕິແຫ່ງຊາດ ຄົບຮອບ 14 ປີ (30 ມິຖຸນາ 2010 ເຖິງ 30 ມິຖຸນາ 2024) ໂດຍ ໃຫ້ກຽດເປັນປະທານ ແລະ ກ່າວເປີດກອງປະຊຸມ ໂດຍທ່ານ ປອ. ເພັດ ພົມພີພັກ, ລັດຖະມົນຕີ ກະຊວງແຜນການ ແລະການລົງທຶນ, ມີອະດີດການນຳ ຂອງກະຊວງແຜນການ ແລະ ການລົງທຶນ, ຄະນະນຳ ສູນສະຖິຕິແຫ່ງຊາດ, ຄະນະກົມ ແລະ ຄະນະພະແນກ ຈາກພາຍໃນກະຊວງແຜນການ ແລະ ການລົງທຶນ, ບັນດາກະຊວງ ແລະ ຂະແໜງການ, ບັນດາແຂວງ ແລະ ນະຄອນຫຼວງ ທັງໝົດ ແມ່ນຫຼາຍກວ່າ 125 ທ່ານ. ຈຸດປະສົງ ແລະ ເນື້ອໃນຂອງກອງປະຊຸມສຳມະນາໃນຄັ້ງນີ້ປະກອບມີ ການເຜີຍແຜ່ບົດລາຍງານການສຳຫຼວດດັດສະນີໝາຍສັງຄົມລາວ ຄັ້ງທີ III; ບົດລາຍງານສະພາບການເຕີບໂຕເສດຖະກິດຂອງ ສປປ ລາວ ປະຈຳປີ 2023 ແລະ ທ່າອ່ຽງປີ 2024, ແຜນການປັບປຸງການຄິດໄລ່ລວມຍອດຜະລິດຕະພັນພາຍໃນ ລວມທັງການວັດແທກການເຕີບໂຕຂັ້ນ ແຂວງ , ແຜນດຳເນີນງານປັບປຸງການຜະລິດຕົວຊີ້ບອກສະຖິຕິຂົງເຂດເສດຖະກິດ, ສັງຄົມ ແລະ ສິ່ງແວດລ້ອມ-ຄວາມໝັ້ນຄົງ. ພ້ອມກັນນັ້ນ, ຍັງໄດ້ປຶກສາຫາແຜນງານການສ້າງ ສ້າງຍຸດທະສາດລະບົບສະຖິຕິແຫ່ງຊາດໄລຍະ 2026-2035 ແລະ ວິໄສທັດ 2040, ພິເສດໃນກອງປະຊຸມຍັງໄດ້ຍົກຫົວຂໍ້ທີ່ສຳຄັນໃນການສົນສະນາແລກປ່ຽນ (Panel Discussion) ລະຫວ່າງສູນສະຖິຕິແຫ່ງຊາດ ກັບບັນດາຂະແໜງການອ້ອມຂ້າງສູນກາງ ແລະ ບັນດາແຂວງ ກ່ຽວກັບແນວຄວາມຄິດໃນການເຊື່ອມໂຍງຂໍ້ມູນ ແລະ ນຳໃຊ້ເທັກໂນໂລຊີທີ່ທັນສະໄໝເຂົ້າໃນການເກັບກຳ, ຜະລິດ ແລະ ເຜີຍແຜ່ຂໍ້ມູນສະຖິຕິທາງການ ຢູ່ຂັ້ນສູນກາງ ແລະ ທ້ອງຖິ່ນ. ໃນໂອກາດສຳຄັນນີ້ ທ່ານ ລັດຖະມົນຕີ ກະຊວງແຜນການ ແລະ ການລົງທຶນ ຕໍ່ກອງປະຊຸມ ທ່ານ ຍັງໄດ້ເໜັ້ນຕຶ່ມວ່າ ປັດຈຸບັນ, ໂລກຂອງພວກເຮົານັ້ນໄດ້ມີການປ່ຽນແປງຢ່າງໄວວາ, ເຮັດໃຫ້ຄາດເດົາໄດ້ຍາກ, ເສດຖະກິດໂລກມີຄວາມບອບບາງ ສະພາບເງິນຕາຜັນຜວນ, ເກີດມີໄພເງິນເຟີ້ ແລະ ວິກິດການເງິນເກີດຂຶ້ນ ໃນບາງພາກພື້ນ. ພາຍຫລັງການແຜ່ລະບາດຂອງພະຍາດໂຄວິດ19 ທີ່ຫາກໍ່ສະຫງົບບລົງ. ສະນັັ້ນ, ເພື່ອຕອບສະໜອງໃຫ້ການວາງແຜນນະໂຍບາຍການພັດທະນາປະເທດ ໃຫ້ດີຂຶ້ນ ແລະ ຮັດກຸມ, ຂໍ້ມູນສະຖິຕິຈຶ່ງເປັນໜຶ່ງໃນປັດໄຈ ທີ່ເປັນເຄື່ອງມືໄມ້ຫຼາວັດແທກທີ່່ສໍາຄັນ ໃນການປະຕິບັດບັນດານະໂຍບາຍ ໄມ້ງັດເສດຖະກິດ, ຕົວຊີ້້ບອກການພັດທະນາແບບຍືນຍົງ, ການເຕີບໂຕສີຂຽວ ແລະ ແຜນພັດທະນາອື່ນໆ ຂອງລັດຖະບານ, ເຊິ່ງໄດ້ສະເໜີໃຫ້ບັນດາຂະແໜງການ, ແຂວງ ເອົາໃຈໃສ່ ເຊີດຊູນໍໍ້າໃຈ “ຈິດໃຈຮັບຜິດຊອບ” ໃຫ້ແກ່ພະນັກງານຫຼັກແຫຼ່ງທົ່ວລະບົບ ແຕ່ສູນກາງຮອດທ້ອງຖິ່ນ ກໍາແໜ້ນເນື້ອໃນກົດໝາຍວ່າດ້ວຍສະຖິຕິ, ແຜນພັດທະນາເສດຖະກິດ-ສັງຄົມ ແຫ່ງຊາດ, ຍຸດທະສາດພັດທະນາລະບົບສະຖິຕິແຫ່ງຊາດ, ຍົກສູງບົດບາດຂອງຕົນ ເປັນເສນາທິການ ສັງລວມຂໍ້ມູນໃຫ້ຊັດເຈນທັນເວລາ ດ້ວຍຄວາມຮັບຜີດຊອບສູງ, ທຸກຂົງເຂດວຽກງານຕ້ອງຖືບັນຫາຄົນ ຫຼື ວ່າທຶນມະນຸດມາກ່ອນກ້າວໜຶ່ງ, ຕ້ອງສ້າງບຸກຄະລາກອນສະຖິຕິທີ່ມີຄຸນນະພາບ, ໜັກແໜ້ນ ທັງດ້ານແນວຄິດ, ວິຊາສະເພາະຄວາມຊໍານານງານ ແລະ ຈິດໃຈເປັນເຈົ້າ ເພື່ອແນໃສ່ ສ້າງຄວາມເຂັັ້ມແຂງໃຫ້ແກ່ການຈັດຕັັ້ງສະຖິຕິໃນທົ່ວລະບົບ; ຄົ້ນຄວ້າປັບປຸງ ລະບອບແບບແຜນການຜະລິດສະຖິຕິ ຍູ້ແຮງການນໍາໃຊ້ເຄື່ອງມືທັນສະໄໝ ແລະ ເຊື່ອມໂຍງຖານຂໍ້ມູນໃນທົ່ວລະບົບສະຖິຕິແຫ່ງຊາດ, ສ້າງນະວັດຕະກໍາໃໝ່ຂໍ້ມູນ-ຂ່າວສານສະຖິຕິ ໃຫ້ສາມາດ ສັງລວມຂໍ້ມູນໂລ່ງລຽນ ບຸກທະລຸລາຍງານຂໍ້ມູນ-ຂ່າວສານ ໃຫ້ລັດຖະບານທັນເວລາ ຕາມທິດ “ຫັນເປັນລັດຖະບານດີຈີຕອນ” ເປັນເຈົ້າການ ສຸມໃສ່ວິເຄາະວິໄຈ ແລະ ຄາດຄະເນຂໍ້ມູນຕົວຊີ້ບອກ ເພື່ອຮັບໃຊ້ການຕິດຕາມປະເມີນວັດແທກຜົນສໍາເລັດຂອງ ແຜນພັດທະນາເສດຖະກິດ-ສັງຄົມແຫ່ງຊາດ ຄັັ້ງທີ IX ແລະ ກະກຽມສ້າງແຜນ X (ປີ 2025-2030). ນອກຈາກນັັ້ນ, ກໍ່ຄົ້ນຄວ້າການຜະລິດຂໍ້ມູນໄລຍະສັັ້ນ ທີ່ສາມາດລາຍງານການເໜັງຕີງ ຂອງເສດຖະກິດ ໃຫ້ລັດຖະບານຫຼາຍກວ່າເກົ່າ, ສຶກສາການຄາດຄະເນພະຍາກອນ ຊ່ວຍໃຫ້ພັກ ແລະ ລັດຖະບານ ສາມາດເບິ່ງເຫັນວີໄສທັດກວ້າງໄກ ໃນອີກ 10-20 ປີຕໍ່ໜ້າກໍ່ຄືການກະກຽມວາງ ວິໄສທັດ ຂອງພັກ ໃນກອງປະຊຸມໃຫຍ່ ຄັັ້ງທີ XII ທີ່ຈະໄຂຂື້ນໃນຕໍ່ໜ້າ; ເສີມຂະຫຍາຍການຮ່ວມມື ດ້ານການພັດທະນາສະຖິຕິກັບພາກພື້ນ ແລະ ສາກົນ, ຍາດແຍ່ງການຊ່ວຍເຫຼືອ ແລະ ລະດົມແຫຼ່ງທຶນຈາກພາຍໃນ ແລະ ຕ່າງປະເທດ ສົມທົບກັບງົບປະມານຂອງລັດຖະບານ. ທ່ານ ຍັງຍົກຕື່ມວ່າ “ສະຖິຕິ ປຽບເໝືອນແວ່ນແຍງ ທີ່່ສະທ້ອນໃຫ້ເຫັນ ເຖິງຄວາມເປັນຈິງ ແລະ ທັງສາມາດສະແດງເຖິງ ທ່າອ່ຽງຂອງສະພາບທີ່ຜ່ານມາ ເຊິ່ງເປັນພື້ນຖານໃຫ້ແກ່ການພະຍາກອນ ສະພາບອະນາຄົດ”. ເຊິ່ງກອງປະຊຸມຄັ້ງນີ້ ຈະດຳເນີນໄປຮອດ ວັນທີ 4 ກໍລະກົດ 2014 ຈິ່ງຈະອັດລົງ ຕາມຄາດ ໝາຍທີ່ໄດ້ກຳນົດໄວ້.
