ກອງປະຊຸມເຜີຍແຜ່ຜົນການສຳຫຼວດເສດຖະກິດ ທົ່ວປະເທດ ຄັ້ງທີ III ປີ 2020

ໃນຕອນເຊົ້າຂອງວັນທີ 16 ກຸມພາ 2021 ສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ ໄດ້ຈັດກອງປະຊຸມເຜີຍແຜ່ຜົນການສຳຫຼວດສະຖິຕິເສດຖະກິດ ທົ່ວປະເທດ ຄັ້ງທີ III ປີ 2020 ຢູ່ ທີ່ ໂຮງແຮມຄຣາວພຣາຊາ, ນະຄອນຫຼວງວຽງຈັນ ກອງປະຊຸມຄັ້ງນີ້ໄດ້ໃຫ້ກຽດເຂົ້າຮ່ວມເປັນປະທານ ໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວ​ໜ້າຄະ​ນະ​ຊີ້​ນຳລະ​ດັບ​ຊາດຂອງການສຳຫຼວດເສດຖະກິດ ທົ່ວປະເທດ ຄັ້ງທີ III ປີ 2019-2020. ມີບັນດາຄະນະຊີ້ນຳລະດັບຊາດ, ຫົວໜ້າກົມ, ຮອງກົມ ແລະ ພະນັກງານສູນສະຖິິຕິແຫ່ງຊາດ ແລະ ບັນດາກະຊວງອ້ອມຂ້າງສູນກາງ ເຂົ້າຮ່ວມ 100 ກວ່າຄົນ. ໃນກອງປະຊຸມ ທ່ານ ນ ພອນສະຫລີ ສຸກສະຫວັດ ຫົວໜ້າສູນສະຖິຕິແຫ່ງຊາດ, ຄະນະຊີ້ນຳລະດັບຊາດທັງເປັນຜູ້ປະຈຳການ ໄດ້ລາຍງານຜົນຂອງການຈັດຕັ້ງປະຕິບັດການສຳຫຼວດເສດຖະກິດ ທົ່ວປະເທດ ຄັ້ງທີ III, ຈາກນັ້ນ ທ່ານ ວິໄລສຸກ ສີສຸລາດ ຮອງຫົວໜ້າກົມສະຖິຕິສັງຄົມ, ຮອງຫົວໜ້າຫ້ອງການກອງເລຂາສຳຫຼວດເສດຖະກິດ ທົ່ວປະເທດ ທົ່ວປະເທດ ຄັ້ງທີ III ໄດ້ສະເໜີບາງຂໍ້ມູນຕົ້ນຕໍຂອງການສຳຫຼວດ ເຊັ່ນ: ຈຳ​ນວນ ແລະ ທີ່ຕັ້ງ​ຫົວ​ໜ່ວຍພຶ້ນ​ຖານເສດ​ຖະ​ກິດ; ການ​ຂະ​ຫຍາຍ​ຕົວທາງ​ດ້ານຈຳ​ນວນ​ຫົວ​ໜ່ວຍພຶ້ນ​ຖານເສດ​ຖະ​ກິດ; ຂະ​ໜາດ ແລະ ຂົງ​ເຂດຂະ​ແໜງ​ການຜະ​ລິດ ຫລື ການ​ເຄື່ອນ​ໄຫວຂອງ​ບັນ​ດາຫົວໜ່ວຍພື້ນຖານເສດຖະກິດໃນທົ່ວປະເທດ; ຮູບແບບວິສາຫະກິດ, ທຶນ, ການຖືບັນຊີ ແລະ ການເສຍພັນທະຂອງວິສາຫະກິດ; ແຮງງານ ແລະ ການປະກັນສັງຄົມ; ລາຍຮັບ ແລະ ລາຍຈ່າຍຂອງຫົວໜ່ວຍທຸລະກິດ,  ການເຂົ້າເຖິງແຫຼ່ງທຶນຂອງຫົວໜ່ວຍທຸລະກິດ, ການນໍາໃຊ້ເທັກໂນໂລຊີເຂົ້າໃນການຜະລິດ ແລະ ອື່ນໆ.

     ໃນຕອນທ້າຍຂອງກອງປະຊຸມ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວ​ໜ້າຄະ​ນະ​ຊີ້​ນຳລະ​ດັບ​ຊາດຂອງການສຳຫຼວດເສດຖະກິດ ທົ່ວປະເທດ ຄັ້ງທີ III ໄດ້ມີການຖະແຫຼງຂ່າວ ແລະ ປະກາດຜົນຂອງການສຳຫຼວດເສດຖະກິດ ທົ່ວປະເທດ ຄັ້ງທີ III ຢ່າງເປັນທາງການ.