ໃນຕອນເຊົ້າ ຂອງວັນທີ 6 ສິງຫາ 2024 ຢູ່ທ່າລາດ ເມືອງ ແກ້ວອຸດົມ, ແຂວງ ວຽງຈັນ ກົມສະຖິຕິເສດຖະກິດ, ສູນສະຖິຕິແຫ່ງຊາດ ໄດ້ຈັດກອງປະຊຸມສໍາມະນາ ພາຍໃຕ້ຫົວຂໍ້: ທົດລອງການນໍາໃຊ້ ປື້ມຄູ່ມືການຄິດໄລ່ ລວມຍອດຜະລິດຕະພັນພາຍໃນ ຫລື GDP ລະດັບແຂວງ ແລະ ບົດແນະນໍາການປະເມີນການຂະຫຍາຍຕົວທາງດ້ານເສດຖະກິດຂອງເມືອງ, ໂດຍການເປັນປະທານ ຂອງທ່ານ ຄໍາພັນ ຈະເລີນຜົນ ຫົວໜ້າກົມສະຖິຕິເສດຖະກິດ, ສູນສະຖິຕິແຫ່ງຊາດ, ມີຜູ້ເຂົ້າຮ່ວມ ມາຈາກສູນສະຖິຕິແຫ່ງຊາດ, ພະແນກແຜນການ ແລະ ລົງທຶນ ແຂວງ ບໍ່ແກ້ວ, ໄຊຍະບູລີ ແລະ ແຂວງ ວຽງຈັນ ແລະ ເມືອງ ທັງໝົດຈໍານວນ 20 ທ່ານ ກອງປະຊຸມສໍາມະນາດັ່ງກ່າວ ຈະໄດ້ດໍາເນີນໄປເປັນເວລາ 4 ວັນ ເຊີ່ງຈະໄດ້ເນັ້ນໜັກໃຫ້ຜູ້ເຂົ້າຮ່ວມ ມີຄວາມເຂົ້າໃຈ ແລະ ເປັນເອກພາບ ການນໍາໃຊ້ຄູ່ມື, ລະບົບການຄິດໄລ່ ແລະ ລາຍງານ ເພື່ອຮັບປະກັນໃຫ້ແກ່ການຜະລິດ ແລະ ການລາຍງານຂໍ້ມູນຖິຕິທາງການ ໂດຍສະເພາະຢູໃນຂັ້ນທ້ອງຖິ່ນ ໃຫ້ໄປຕາມແຜນຍຸດທະສາດ ການພັດທະນາລະບົບສະຖິຕິແຫ່ງຊາດແບບຍືນຍົງ 2016-2025 ແລະ ວິໄສທັດ 2030.
